МАПАС одржа едукативно предавање за вработените во Општина Центар по повод Денови на финансиска писменост

По повод Денови на финансиска писменост, МАПАС одржа едукативно предавање за вработените во Општина Центар, со цел да се истакне важноста од навремена финансиска едукација и правилно информирање за функционирањето на пензискиот систем. Учесниците се запознаа со структурата и улогата на сите три столба на капитално финансираното пензиско осигурување.

Експертите од МАПАС дадоа јасен преглед на првиот, вториот и третиот пензиски столб, при што беше објаснето како секој од нив функционира, како се пресметуваат средствата и на кој начин граѓаните можат да ја следат сопствената пензиска заштеда. Особено беше нагласена важноста од редовно информирање и користење на достапните дигитални алатки, кои обезбедуваат транспарентен увид во личните пензиски средства.

Предавањето вклучи интерактивна дискусија, во која вработените поставуваа прашања, бараа дополнителни појаснувања и споделуваа ситуации од секојдневната практика, што придонесе за подлабоко и покорисно разбирање на сите три столба и нивната меѓусебна поврзаност.

Настанот го истакна значењето на Денови на финансиска писменост како потсетник дека навременото знаење и точните информации се клучни за стабилни, одговорни и долгорочни финансиски одлуки. МАПАС ќе продолжи со вакви активности за поддршка на граѓаните во градењето сигурна финансиска иднина.