(02) 3224 229
contact@mapas.mk
Me ftesë të Asociacionit Bankar të Maqedonisë (ABM), kryetari i Këshillit të Ekspertëve të MAPAS-it, Remzi Bajrami, dhe këshilltarja kryesore e kryetarit, Marija Popovska, morën pjesë në Banking Roundtable – Global Banking Annual Review 2026, të mbajtur më 9 nëntor 2026 në Shkup, në organizim të McKinsey & Company, Finalta by McKinsey dhe Asociacionit Bankar të Maqedonisë.
Në këtë ngjarje u prezantuan trendet aktuale globale dhe rajonale në sektorin bankar, zbatimi praktik i inteligjencës artificiale në institucionet financiare, si dhe qasja e Finalta by McKinsey për analizën krahasuese të performancës, sjelljes së klientëve dhe prioriteteve të reja në sektorin bankar në Evropën Qendrore dhe Lindore.
Pjesëmarrja e MAPAS-it në ngjarje të tilla profesionale është e rëndësishme për ndjekjen e praktikave bashkëkohore në sektorin financiar, transformimin digjital, zbatimin e inteligjencës artificiale dhe përdorimin e metodologjive krahasuese për matjen e efikasitetit dhe performancës së institucioneve financiare.
Në kuadër të ngjarjes, përfaqësuesit e MAPAS-it zhvilluan bisedime me përfaqësuesit e McKinsey & Company dhe Finalta by McKinsey lidhur me mundësitë e përshtatjes së qasjeve dhe zgjidhjeve të caktuara analitike dhe teknologjike, të cilat zbatohen në sektorin financiar, me specifikat e sigurimit pensional me financim kapital.
Vëmendje e veçantë iu kushtua mundësive për zhvillimin e një qasjeje metodologjike për analizën krahasuese të punës së shoqërive pensionale dhe fondeve pensionale, bazuar në tregues relevantë për efikasitetin operacional, performancën investuese, menaxhimin e rreziqeve dhe vlerën që u ofrohet anëtarëve të fondeve pensionale.
Për MAPAS-in, shqyrtimi i këtyre qasjeve është i rëndësishëm edhe nga aspekti i avancimit të mëtejshëm të mbikëqyrjes së bazuar në rreziqe, shfrytëzimit më efikas të të dhënave në procesin e mbikëqyrjes dhe shqyrtimit të mundësive për krahasimin e sistemit vendor pensional me financim kapital me praktikat përkatëse ndërkombëtare dhe sistemet e krahasueshme.
Shkëmbimi i përvojave paraqet një mundësi që MAPAS-i të ndjekë në vazhdimësi risitë që zbatohen në sektorin më të gjerë financiar dhe të vlerësojë zbatueshmërinë e tyre në sigurimin pensional, duke u udhëhequr, para së gjithash, nga mbrojtja e interesave të anëtarëve dhe anëtarëve të pensionuar, stabiliteti i sistemit dhe avancimi i cilësisë dhe efikasitetit të mbikëqyrjes.
