Nënshkruhet Memorandum Bashkëpunimi me Agjencinë Kroate për Mbikëqyrjen e Shërbimeve Financiare (Hanfa)

Në kuadër të aktiviteteve të planifikuara drejt qëllimit strategjik – Përmirësimit të kapaciteteve në drejtim të forcimit të rolit të saj mbikëqyrës dhe rregullator në sigurimin pensional të financuar nga kapitali, Agjencia për Mbikëqyrje të Financimit Kapital të Sigurimit Pensional – MAPAS, më 10 korrik 2024, ishte mysafir i Agjencisë Kroate për Mbikëqyrjen e Shërbimeve financiare (Hanfa) në Republikën e Kroacisë.

Qëllimi i vizitës ishte krijimi dhe fillimi i bashkëpunimit me Agjencinë Kroate të Mbikëqyrjes së Shërbimeve Financiare (Hanfa). Memorandumi i Bashkëpunimit u nënshkrua nga kryetari i Këshillit të Ekspertëve të MAPAS-it, Maksud Ali dhe Kryetari i Këshillit Administrativ të Hanfa-s, Ante Zigman.

Sipas Memorandumit të Bashkëpunimit, palët kontraktuese do të shkëmbejnë përvojat e fituara në fushën e sigurimit pensional të financuar me kapital, funksionimin e fondeve pensionale, mekanizmat e mbikëqyrjes së fondeve pensionale dhe rregulloren e miratuar. Bashkëpunimi teknik do të konsistojë në shkëmbimin e dokumenteve, asistencë dypalëshe me qëllim të shkëmbimit të përvojave me interes të ndërsjellë, si dhe bashkëpunim në fushën e arsimit, kërkimit, trajnimit dhe zhvillimit me interes të përbashkët.

Hanfa dhe MAPAS janë anëtarë të IOPS (Organizata Ndërkombëtare e Mbikëqyrësve të Pensional). Memorandumi i bashkëpunimit do t’i ndihmojë Republikës së Maqedonisë së Veriut në procesin e harmonizimit të kornizës rregullative dhe forcimit të kapaciteteve administrative me qëllim të anëtarësimit në Bashkimin Evropian. Theks i veçantë do t’i kushtohet asistencës teknike përmes programeve të BE-së  TAIEX dhe Twinning, ku Hanfa mund të ofrojë mbështetje bazuar në përvojat e kaluara.

Përmes programit TAIEX, në periudhën e ardhshme do të mbahen një sërë takimesh pune ndërmjet përfaqësuesve të Hanfa dhe MAPAS. Në kuadër të vizitës së parë zyrtare në Zagreb, pas nënshkrimit të memorandumit, u mbajt një takim pune dyditor, gjatë të cilit përfaqësuesve të MAPAS-it iu prezantuan modelet e vlerësimit të rrezikut sistemik të aplikuara nga Hanfa dhe rregullatorë të tjerë në BE, fushat kryesore të mbikëqyrjes së tregut të brendshëm të fondeve pensionale, si dhe aktivitetet e mëparshme të Hanfa në fushën e edukimit të qytetarëve për rëndësinë e kursimeve pensionale.

Në vitet në vijim, MAPAS do të vazhdojë të avancojë praktikën e krijuar të bashkëpunimit në mënyrë që të mbajë komunikim të suksesshëm me organet e tjera mbikëqyrëse dhe autoritetet dhe institucionet përkatëse në mënyrë që të kontribuojë në ruajtjen e një sigurimi pensional të financuar nga kapitali të qëndrueshëm dhe transparent dhe në përmirësimin e mbikëqyrjes së sigurimit pensional të financuar nga kapitali.